زي مانتي

فاكرة...؟
آخر مرة شفتك فيها...

من كام شهر ولا باين كام سنة
مش عارف بقا..
ابقي احسبيها....
فاكرة ..لما قلتلك على بعدك مش باقدر
وقلتيلي اصبر
وساعتها زعلت اكتر
وفهمتي اني بستهبل ..عشان تطبطبي عليا
وتقولي: معليش..عديها
وعدِت...
...على فكرة
كنتي حلوة قوي يوميها

فاكرة...؟
لما قلت لو سبتك مش هاعيش
وقلتيلي لا هتقدر..ده انت جايز ترتاح اكتر
تصدقي
اني فعلا قدرت..بس راحة ايه اللي تقصديها
فحياتي.؟! ولا عمري حسيتها طول مانتي مش فيها

فاكرة يومها شفت دموع عنيكي وقلت مالك
قلتي :لا......مفيش
متخافيش....

مش هاقولك اني كنت عارف
ان انتي عارفه ..

دي آخر مرة هنشوف بعض فيها
عشان كده مسألتكيش
هشوفك امتى تاني
كنت مستني انتي تقوليها
ومقولتيهاش
ساكتة ليه... إيه ...بلاش.؟!
مش عايزاني افكرك بيا
باللعبة اللي لما زهقتي منها ..رمتيها
خلاص بلاش
اديني عشت..بس عارفة
ايه اكتر حاجة عايزك تعرفيها
انك لما كنتي تقولي الظروف
ومش قادرة آجي وهابقا اشوف
كنتي بتبقي كاشفة نفسك
وفاكرة ان حقيقتك
لوحدك انتي بس الي تشوفيها
مش هاقولك تاني فاكرة
..لأن انتي فاكرة
كل لحظة وكل كلمة ..عليها لحد النهرده عايشة
واستحالة تبقي نسيتيها
وانك مهما رحتي لحد تاني
هترجعيلي
عارفه ليه
كل ما تبصي في عيونه تلاقيني
اول حب بجد شدك
حد كان بيفهِمِك نفسك
وياريتك بجد فهمتيها

كنت عايزك تبقي صح..تبقي حد كامل
تسيبي صورتك في عنيا كامله ..من غير ماتنقصيها
بس لا....
معنى رجوعك ليا النهردة
مش لاقية ولا كلمة تقوليها
انك لسة زي مانتي
تسيبي الحاجة الي تطوليها
وأول ما تبقى ف ايدك تاني تسيبيها..!!ا
وعشان كل ده
هسيبك انا تعيشي
صح بقا..غلط..ما يهمنيش
صدقيني..خلاص ماعدش ليا فيها